भोजपुरी: हरेश्वर राय

हमार सान ह, हमार पहचान ह भोजपुरी
हमार मतारी ह, हमार जान ह भोजपुरी।

इहे ह खेत, इहे खरिहान ह
इहे ह सोखा, इहे सिवान ह
हमार सुरुज, हमार चान ह भोजपुरी।

बचपन बुढ़ापा ह, इहे जवानी
अगिया भी इहे ह, इहे ह पानी
हमार सांझ, हमार बिहान ह भोजपुरी।

ओढ़िला इहे, आ इहे बिछाइला
कूटिला इहे, आ इहे पिसाइला
हमार चाउर, हमार पिसान ह भोजपुरी।

धरनिया ह इहे, इहे ह छान्ही
हमरा पसीना के ह इ कहानी
हमार तीर ह, हमार कमान ह भोजपुरी।

इहे ह कजरी, इहे ह फाग
इहे कबीरा ह, इहे ह घाघ
हमार धरम ह, हमार ईमान ह भोजपुरी।
हरेश्वर राय 
प्रोफेसर ऑफ़ इंग्लिश 
शासकीय पी. जी. महाविद्यालय सतना 
सतना मध्य प्रदेश 

टिप्पणियाँ

लोकप्रिय पोस्ट

मुखिया जी: उमेश कुमार राय

जा ए भकचोन्हर: डॉ. जयकान्त सिंह 'जय'